ခရီးသည် ၃၀ ဦးကျော် တင်ဆောင်လာသည့်
ရန်ကုန်-ထားဝယ် ခရီးသည်တင် ယာဉ်တစ်စီး ဇန်န၀ါရီ ၁၀ ရက် နံနက် ၆ နာရီခန့်က
ရန်ကုန်တိုင်း လှည်းကူးမြို့နယ်ရှိ ရန်ကုန်-မန္တလေး အမြန်လမ်းမပေါ်တွင်
မီးလောင်ကျွမ်းမှု ဖြစ်ပွားခဲ့သည်။
ဖြစ်စဉ်မှာ ထားဝယ်မှ ရန်ကုန်မြို့သို့
ထွက်ခွာလာသည့် ငွေငန်းဖြူ မော်တော်ယာဉ်လိုင်းမှ ၉င/၅၁၂၇
ဟွန်ဒိုင်းအမျိုးအစား ခရီးသည်တင်ယာဉ်သည် ရန်ကုန်-မန္တလေး အမြန်လမ်း၊
မိုင်တိုင်အမှတ် ၂၂/၁ အနီးအရောက် ကားနောက်ပိုင်းရှိ အင်ဂျင်စက်ခန်း
အတွင်းမှ မီးခိုးများ ထွက်လာကာ မီးလောင်ကျွမ်းမှု ဖြစ်ပွားခဲ့ခြင်းဖြစ်ပြီး
မီးလောင်ကျွမ်းမှုကြောင့် ထိခိုက်ဒဏ်ရာရ သေဆုံးသူ မရှိကြောင်း သိရသည်။
“စသိသိချင်းက နောက်အင်ဂျင်စက်ခန်းက မီးခိုးတွေ ထွက်လာတယ်။ ၀ိုင်ယာရှော့ခ်
ဖြစ်တာပဲပေါ့။ သိသိချင်း မီးခိုးတွေ ထွက်လာတော့ ခရီးသည်တွေကို
အရင်ပေးဆင်းတယ်။ ယာဉ်အောက်ရောက်တော့ မီးလောင်တဲ့ နေရာကို
စက်ဖုံးဖွင့်ပြီးတော့ မီးသတ်ဆေးဘူးနဲ့ ဖျန်းတယ်။ ခရီးသည်တွေကလည်း သဲတွေနဲ့
နိုင်သလောက် ၀ိုင်းပတ်ဝိုင်းဖျန်း ပေးပါတယ်။ ဒါပေမဲ့ ဘယ်လိုမှ မီးက
မနိုင်တော့ဘူး။ မီးအရမ်းများတယ်။ တစ်နာရီတောင် မပြည့်ပါဘူး။ အဲဒီအတော
အတွင်းမှာ တစ်စီးလုံး လောင်သွားတယ်။ တစ်ခါမှလည်း ဒီလိုမျိုး မကြုံဖူးဘူး။
အရမ်းလည်း စိတ်မကောင်းဖြစ်တယ်။ ၀မ်းလည်း ၀မ်းနည်းပါတယ်” ဟု
မီးလောင်ကျွမ်းမှု ဖြစ်ပွားခဲ့သည့် ငွေငန်းဖြူ မော်တော်ယာဉ်မှ
ခရီးသည်များအား ၀န်ဆောင်မှုပေးသူ မခင်သန္တာဝင်းက ပြောကြားသည်။
“မီးလောင်လောင်ချင်းမှာ ကျွန်မ ၁၉၉ ကို ဖုန်းဆက်တယ်။ ဖုန်းဆက်ပြီးတော့
နီးစပ်ရာ မီးသတ်ကားရဲ့ ဖုန်းနံပါတ်ကို တောင်းပါတယ်။ ဘုရားကြီးရဲ့ မီးသတ်ကား
ဖုန်းနံပါတ်ကို ပေးတယ်။ အဲဒီကို ဖုန်းဆက်လိုက်ပါတယ်။ ဆက်လိုက်တော့
မီးသတ်ကားတွေ ရဲတွေရောက်လာပါတယ်။ ခရီးသည်တွေက သူတို့ရဲ့ ပစ္စည်းတွေ
လိုချင်တယ်ဆိုလို့ စပယ်ယာက သယ်ထုတ်ပေးပါတယ်။ ခရီးသည်တွေလည်း အသက်အန္တရာယ်
မစိုးရိမ်ရပါဘူး” ဟု ၎င်းက ဆက်လက် ပြောကြားသည်။
အဆိုပါ
မီးလောင်ကျွမ်းမှုနှင့် ပတ်သက်၍ ယာဉ်မောင်း ဦးအောင်မော်အား ပြစ်မှုပုဒ်မ (ပ)
၂၈၅၊ ၂/၁၄ ဖြင့် အမှုဖွင့် အရေးယူထားကြောင်း သိရသည်။
“ဖြစ်စဉ်က
ဒီနေ့ မနက် ၆ နာရီ ၂၀ လောက်က ခရီးသည်တင် ယာဉ်တစ်စီး မီးလောင်တယ်လို့
သတင်းရတယ်။ ထားဝယ်ဘက်က လာတဲ့ကားပါ။ အင်ဂျင်ခန်းမှာရှိတဲ့ ၀ိုင်ယာတွေ
ရှော့ဖြစ်ပြီးတော့ လောင်သွားတာပေါ့။ သူတို့ပါတဲ့ မီးသတ်ဆေးဘူးတွေနဲ့
ငြှိမ်းသတ်သေးတယ်။ မနိုင်တော့လို့။ ခရီးသည်တွေက ၃၂ ယောက်ပါတယ်။ ဘယ်သူမှတော့
ဒဏ်ရာမရဘူး။ ယာဉ်မောင်းကိုတော့ ဥပဒေအရ ဆက်လက် အရေးယူ သွားမှာပါ” အမှတ် (၃)
လမ်းဆုံ အမြန်လမ်း ရဲစခန်းမှ ဒုရဲမှူး ဦးခင်မောင်အေးက ပြောကြားသည်။
အဆိုပါ ခရီးသည်တင်ယာဉ်သည် လမ်းခရီးတွင် ခရီးသည်များ အနားယူရန် စုစုပေါင်း သုံးကြိမ်ခေတ္တ ရပ်နားခဲ့ကြောင်း သိရသည်။
eleven media group
No comments:
Post a Comment